ಪ್ರಜಾಪ್ರಭುತ್ವ ಮತ್ತು ಸಂಸದೀಯ ವ್ಯವಸ್ಥೆಯ ಸದ್ಬಳಕೆಯಿಂದಷ್ಟೇ ಮಾದರಿ ಸಮಾಜ ನಿರ್ಮಾಣ ಸಾಧ್ಯ
ಭಾರತದ ಸಂವಿಧಾನ ನೀಡಿರುವ ಪ್ರಜಾಪ್ರಭುತ್ವ, ಆಡಳಿತ ಹಾಗೂ ಸಂಸದೀಯ ವ್ಯವಸ್ಥೆಗಳನ್ನ ಯುವಜನತೆ ಮತ್ತು ಪ್ರತಿಯೊಬ್ಬ ನಾಗರಿಕರು ಸೂಕ್ತವಾಗಿ, ಅರ್ಥಪೂರ್ಣವಾಗಿ ಬಳಸಿಕೊಂಡಾಗ ಮಾತ್ರ ಸರ್ವರಿಗೂ ಸಮಾನತೆ ಕಲ್ಪಿಸುವ ಹಾಗೂ ಸಶಕ್ತವಾದ ಉತ್ತಮ ಸಮಾಜವನ್ನ ಕಟ್ಟಲು ಸಾಧ್ಯ ಎಂದು ರಾಜ್ಯ ಜಲಸಂಪನ್ಮೂಲ ಸಚಿವರಾದ ಎನ್. ಚಲುವರಾಯಸ್ವಾಮಿ ಅವರು ಹೇಳಿದರು.
ಮಂಡ್ಯ ಜಿಲ್ಲಾ ಪಂಚಾಯತ್ ಆವರಣದ ಕಾವೇರಿ ಸಭಾಂಗಣದಲ್ಲಿ ಆಯೋಜಿಸಲಾಗಿದ್ದ ಜಿಲ್ಲಾ ಮಟ್ಟದ “ಯುವ ಸಂಸತ್ತು” ಸ್ಪರ್ಧಾ ಕಾರ್ಯಕ್ರಮವನ್ನ ಉದ್ಘಾಟಿಸಿ ಅವರು ಸುದೀರ್ಘವಾಗಿ ಮಾತನಾಡಿದರು. ಪ್ರಜಾಪ್ರಭುತ್ವದ ಅಡಿಪಾಯ, ಸಂಸದೀಯ ನಿಯಮಗಳು, ಮತದಾನದ ಪಾವಿತ್ರ್ಯತೆ ಮತ್ತು ಇಂದಿನ ಯುವ ಪೀಳಿಗೆಯ ಸಾಮಾಜಿಕ ಜವಾಬ್ದಾರಿಗಳ ಕುರಿತು ಸಚಿವರು ಸಭಿಕರಲ್ಲಿ ಗಂಭೀರ ಚಿಂತನೆ ಮೂಡಿಸಿದರು.
ಪ್ರಜಾಪ್ರಭುತ್ವದಲ್ಲಿ ಮಾತು ಅರ್ಥಗರ್ಭಿತವಾಗಿರಲಿ; ಕೇವಲ ನಿಂದನೆಯಾಗದಿರಲಿ
ತಮ್ಮ ರಾಜಕೀಯ ಹಾಗೂ ಸಾರ್ವಜನಿಕ ಜೀವನದ ನೈಜ ಘಟನೆಯೊಂದನ್ನ ನೆನಪಿಸಿಕೊಂಡ ಸಚಿವರು, “ಒಮ್ಮೆ ನಾನೂ ಹಾಗೂ ಶ್ರೀರಂಗಪಟ್ಟಣದ ಶಾಸಕರು ರೈತರು ನಡೆಸುತ್ತಿದ್ದ ಪ್ರತಿಭಟನಾ ಸ್ಥಳಕ್ಕೆ ಭೇಟಿ ನೀಡಿದ್ದೆವು. ಸಂಕಷ್ಟದಲ್ಲಿದ್ದ ರೈತರು ಆಕ್ರೋಶದಿಂದ ದೇಶದ ಪ್ರಧಾನಮಂತ್ರಿಗಳನ್ನ, ರಾಜ್ಯದ ಮುಖ್ಯಮಂತ್ರಿಗಳನ್ನ ತೀವ್ರ ಶಬ್ದಗಳಿಂದ ನಿಂದಿಸುತ್ತಿದ್ದರು. ಅವರ ಸಂಕಷ್ಟ ನಮಗೆ ಅರ್ಥವಾಗುತ್ತದೆ, ಆದರೆ ನಾವು ಪ್ರಜಾಪ್ರಭುತ್ವದ ಆಳವನ್ನ ಅರಿಯಬೇಕಿದೆ. ಈ ವ್ಯವಸ್ಥೆಯನ್ನ ಆಯ್ಕೆ ಮಾಡಿರುವವರು ಯಾರು..? ಆ ಉನ್ನತ ಸ್ಥಾನದಲ್ಲಿ ಕುಳಿತವರನ್ನ ಅಲ್ಲಿಗೆ ಕಳುಹಿಸಿದವರು ಯಾರು? ನಾವೇ ತಾನೇ? ನಮ್ಮದೇ ಮತಗಳಿಂದ ಆಯ್ಕೆಯಾದವರ ಮೇಲೆ ಕೇವಲ ವೈಯಕ್ತಿಕ ನಿಂದನೆ ಮಾಡುವುದರಿಂದ ಸಮಸ್ಯೆ ಬಗೆಹರಿಯುವುದಿಲ್ಲ” ಎಂದು ಘಟನೆಯನ್ನು ವಿವರಿಸಿದರು.
ಮುಂದುವರಿದು ಮಾತನಾಡಿದ ಅವರು, “ಪ್ರಜಾಪ್ರಭುತ್ವದಲ್ಲಿ ನಾವು ಮಾತನಾಡುವ ಮಾತು, ಎತ್ತುವ ಧ್ವನಿ ಸದಾ ಅರ್ಥಗರ್ಭಿತವಾಗಿರಬೇಕು. ನಾವು ಮಂಡಿಸುವ ವಿಷಯ, ಸಮಸ್ಯೆ ಮತ್ತು ಪ್ರಶ್ನೆಗಳು ಎಷ್ಟರಮಟ್ಟಿಗೆ ತೂಕದ್ದಾಗಿರಬೇಕೆಂದರೆ, ಉನ್ನತ ಆಡಳಿತ ಚುಕ್ಕಾಣಿ ಹಿಡಿದಿರುವ ನಾಯಕರು ಮತ್ತು ಅಧಿಕಾರಿಗಳು ಅದಕ್ಕೆ ಜವಾಬ್ದಾರಿಯುತವಾಗಿ ಉತ್ತರ ಕೊಡಲೇಬೇಕಾದ ಪರಿಸ್ಥಿತಿ ನಿರ್ಮಾಣವಾಗಬೇಕು. ಅಂತಹ ಗುಣಾತ್ಮಕ ಸಂವಾದ ಹಾಗೂ ಚರ್ಚೆಗಳು ನಮ್ಮ ಸಮಾಜದಲ್ಲಿ ಬೆಳೆಯಬೇಕು” ಎಂದು ಅಭಿಪ್ರಾಯಪಟ್ಟರು.
ಒಂದು ಮತ ಕೇವಲ ಗುರುತಲ್ಲ, ವ್ಯವಸ್ಥೆಯನ್ನೇ ಬದಲಿಸುವ ಮಹಾನ್ ಅಸ್ತ್ರ
ಮತದಾನದ ಮಹತ್ವವನ್ನು ಯುವಜನತೆಗೆ ಮನದಟ್ಟು ಮಾಡಿದ ಸಚಿವರು, “ಚುನಾವಣೆ ಬಂದಾಗ ಮತ ಚಲಾಯಿಸುವುದನ್ನು ಅನೇಕರು ಕೇವಲ ಒಂದು ಔಪಚಾರಿಕ ಕ್ರಿಯೆ ಅಥವಾ ರಜಾದಿನವೆಂದು ಭಾವಿಸುತ್ತಾರೆ. ಆದರೆ ಒಂದು ಮತ ಎಂಬುದು ಕೇವಲ ಮತವಲ್ಲ; ಅದು ಇಡೀ ಆಡಳಿತ ವ್ಯವಸ್ಥೆಯನ್ನೇ ಬುಡಮೇಲು ಮಾಡುವ, ಸರಿಪಡಿಸುವ ಹಾಗೂ ಬದಲಿಸುವ ಅಗಾಧ ಶಕ್ತಿ. ನಿಮ್ಮ ಒಂದು ಮತ ದೇಶದ ಭವಿಷ್ಯವನ್ನೇ ನಿರ್ಧರಿಸುತ್ತದೆ. ಆದ್ದರಿಂದ ಜಾತಿ, ಹಣ ಅಥವಾ ಯಾವುದೇ ಆಮಿಷಗಳಿಗೆ ಒಳಗಾಗದೆ, ನಾಡಿನ ಅಭಿವೃದ್ಧಿಗೆ ಕಟಿಬದ್ಧವಾಗಿ ಶ್ರಮಿಸುವ ಸೂಕ್ತ ಮತ್ತು ಯೋಗ್ಯ ವ್ಯಕ್ತಿಯನ್ನು ಆಯ್ಕೆ ಮಾಡುವುದು ಪ್ರತಿಯೊಬ್ಬ ಪ್ರಜೆಯ ಆದ್ಯ ಕರ್ತವ್ಯ ಹಾಗೂ ಜವಾಬ್ದಾರಿಯಾಗಿದೆ” ಎಂದು ಕರೆ ನೀಡಿದರು.
ಸಂಸದೀಯ ಮೌಲ್ಯಗಳನ್ನು ಮೈಗೂಡಿಸಿಕೊಳ್ಳಿ
ಇಂದಿನ ಯುವ ಸಂಸತ್ತು ಕಾರ್ಯಕ್ರಮದ ಪ್ರಸ್ತುತತೆಯನ್ನು ವಿವರಿಸಿದ ಅವರು, “ಇಂತಹ ವೇದಿಕೆಗಳು ಕೇವಲ ಭಾಷಣ ಮಾಡುವ ಸ್ಥಳಗಳಲ್ಲ. ದೇಶದ ಶಾಸಕಾಂಗ ಹೇಗೆ ಕಾರ್ಯನಿರ್ವಹಿಸುತ್ತದೆ, ಒಂದು ಮಸೂದೆ ಕಾಯ್ದೆಯಾಗುವುದು ಹೇಗೆ, ಸಾರ್ವಜನಿಕ ಸಮಸ್ಯೆಗಳನ್ನು ಸಭೆಯಲ್ಲಿ ಮಂಡಿಸುವ ಶಿಷ್ಟಾಚಾರವೇನು ಎಂಬುದನ್ನು ಕಲಿಯುವ ಪಾಠಶಾಲೆಗಳಿವು. ಇಂದಿನ ವಿದ್ಯಾರ್ಥಿಗಳೇ ನಾಳಿನ ಶಾಸಕರು, ಸಂಸದರು ಮತ್ತು ಆಡಳಿತಗಾರರು. ಸಂವಿಧಾನ ನಮಗೆ ನೀಡಿರುವ ಹಕ್ಕುಗಳ ಜೊತೆಗೆ ಕರ್ತವ್ಯಗಳನ್ನೂ ಅರಿತುಕೊಂಡು, ಸಂಸದೀಯ ನಿಯಮಗಳನ್ನು ಗೌರವಿಸುವ ಪ್ರಜ್ಞಾವಂತ ನಾಯಕರಾಗಿ ಯುವಜನತೆ ಹೊರಹೊಮ್ಮಬೇಕು” ಎಂದು ಆಶಿಸಿದರು.
ರಾಜ್ಯ ಮಟ್ಟಕ್ಕೆ ಆಯ್ಕೆಯಾಗಲಿರುವ ವಿದ್ಯಾರ್ಥಿಗಳಿಗೆ ವಿಶೇಷ ಅಭಿನಂದನೆ ತಿಳಿಸಿದ ಸಚಿವರು
ಜಿಲ್ಲಾ ಮಟ್ಟದ ಯುವ ಸಂಸತ್ ಸ್ಪರ್ಧೆಯಲ್ಲಿ ಅತ್ಯುತ್ತಮ ವಾಗ್ಮಿಗಳಾಗಿ ಮತ್ತು ಸಂಸದೀಯ ಚರ್ಚೆಗಳಲ್ಲಿ ಮುಂಚೂಣಿ ಸಾಧನೆ ಮಾಡಿ, ಮುಂಬರುವ ರಾಜ್ಯ ಮಟ್ಟದ “ಯುವ ಸಂಸತ್”ಗೆ ಆಯ್ಕೆಯಾಗಲಿರುವ ಮಂಡ್ಯ ಜಿಲ್ಲೆಯ 7 ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಸಚಿವರು ವಿಶೇಷ ಅಭಿನಂದನೆ ತಿಳಿಸಿದರು.
“ಮಂಡ್ಯ ಜಿಲ್ಲೆಯು ರಾಜಕೀಯ ಪ್ರಜ್ಞೆ, ಹೋರಾಟದ ಕಿಚ್ಚು ಮತ್ತು ವೈಚಾರಿಕತೆಗೆ ಹೆಸರುವಾಸಿಯಾದ ನೆಲ. ಇಲ್ಲಿನ ಯುವ ಪ್ರತಿಭೆಗಳು ರಾಜ್ಯ ಮಟ್ಟದಲ್ಲೂ ತಮ್ಮ ಅದ್ಭುತ ವಾದ ಮಂಡನೆ, ವಿಷಯ ಜ್ಞಾನ ಮತ್ತು ಸಂಸದೀಯ ಶಿಸ್ತನ್ನು ಪ್ರದರ್ಶಿಸಬೇಕು. ಕೇವಲ ಭಾಗವಹಿಸುವುದಷ್ಟೇ ಅಲ್ಲದೆ, ರಾಜ್ಯ ಮಟ್ಟದಲ್ಲೂ ಗೆಲುವು ಸಾಧಿಸಿ ಮಂಡ್ಯ ಜಿಲ್ಲೆಯ ಹೆಸರನ್ನ ರಾಜ್ಯಮಟ್ಟದಲ್ಲಿ ರಾರಾಜಿಸುವಂತೆ ಮಾಡಬೇಕು” ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಮಂಡ್ಯ ಕ್ಷೇತ್ರದ ಶಾಸಕರು, ಜಿಲ್ಲೆಯ ಪ್ರಮುಖ ಜನಪ್ರತಿನಿಧಿಗಳು, ಜಿಲ್ಲಾಧಿಕಾರಿಗಳು, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು, ಜಿಲ್ಲಾ ಪೋಲಿಸ್ ವರಿಷ್ಠಾಧಿಕಾರಿಗಳು, ಜಿಲ್ಲಾ ಶಿಕ್ಷಣಾಧಿಕಾರಿಗಳು , ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಅಧಿಕಾರಿಗಳು, ವಿವಿಧ ಕಾಲೇಜುಗಳ ಪ್ರಾಂಶುಪಾಲರು, ಉಪನ್ಯಾಸಕರು ಹಾಗೂ ನೂರಾರು ವಿದ್ಯಾರ್ಥಿ-ಯುವಜನರು ಉಪಸ್ಥಿತರಿದ್ದರು.
